Çilinin “Ærea. İspan – Amerika poeziyası” (“Ærea. Revista Hispanoamericana de Poesía”) jurnalı Dövlət Tərcümə Mərkəzinin “Azərbaycan ədəbiyyatı beynəlxalq aləmdə” layihəsi çərçivəsində Leyla Əliyevanın ispan dilinə tərcümə olunmuş “Gedim bir az ağlayım”, “Tərk edə bilmərəm heç zaman səni” və “İnanmıram” şeirlərini nəşr edib.

Aydınlar.az Tərcümə Mərkəzinə istinadən bildirir ki, şairin yaradıcılığı haqqında geniş məlumatla təqdim olunan şeirlərin ispan dilinə sətri tərcümə müəllifi – Tutuxanım Yunusova, bədii tərcümə redaktoru – tanınmış argentinalı tərcüməçi Raul Poggi Alexandrodur.

Qeyd edək ki, 2001-ci ildən nəşrə başlamış, Eduardo Espina, Monika Velaskes Qusman, Karlos Aquasako, Leonel Alvarado, Luis Benites, Viktor Koral kimi dünya şöhrətli yazıçı və şairlərin yaradıcılığını işıqlandırmaqla İspaniya və Kolumbiyada geniş oxucu auditoriyası toplamış jurnal ABŞ və digər ölkələrin ali təhsil ocaqlarında əlavə dərs vəsaiti kimi tədris proqramlarına da salınır.

Jurnalının baş redaktoru – tanınmış Argentina şairi Daniel Kalabresedir.

"Ulduz" jurnalının gənc yazıçılara həsr olunmuş iyun nömrəsi çap edilib.

Aydınlar.az xəbər verir ki, C.Cabbarlı adına Respublika Gənclər Kitabxanası ilə ortaq layihə çərçivəsində ərsəyə gələn dərgi "Yeni nəsil: proza" devizi altında çapdan çıxıb.

Dərginin sözügedən nömrəsində yeni nəsil yazarlardan Furqan, Orxan Saffari, Təvəkkül Boysunar, Orxan Cuvarlı, Sərdar Amin, Nihat Pir, Həmid Piriyev, Orxan Həsəni, Rəvan Cavid və Nadir Yalçının müxtəlif məzmunlu hekayələri, eləcə də şair-publisist Qulu Ağsəsin "Yuxarıdayam, düşürəm indi" essesi yer alıb.

Birləşmiş Millətlər Təşkilatının (BMT) Cənub-Cənub Şəbəkəsi Ofisi tərəfindən nəşr olunan “Dayanıqlı İnkişaf üçün Cənub-Cənub və Üçtərəfli Əməkdaşlıqda Qabaqcıl Təcrübələr” jurnalda “Azərbaycanda dövlət xidmətlərində mükəmməllik – "ASAN xidmət" təcrübəsi” adı altında geniş məlumat dərc olunub.

Aydınlar.az bildirir ki, Nəşrdə Dayanıqlı İnkişaf Məqsədlərinin (DİM) əldə edilməsi istiqamətində prosesi sürətləndirmək üçün qurumların bu sahədə həyata keçirdiyi layihələr haqqında ətraflı məlumat verilir. Bununla əlaqədar nəşrdə yer alan layihələrin və uğurlu təcrübələrin digər ölkələr tərəfindən öyrənilməsi tövsiyə olunur.

Sözügedən nəşrin DİM 16 (sülh, ədalət və güclü institutlar) bölməsində Azərbaycan brendi olan “ASAN xidmət”in fəaliyyətinə dair məlumatlara ətraflı yer verilib. "Heç kimi arxada qoymamaq" prinsipinə əsaslanaraq şəffaf və effektiv dövlət xidmətlərinin göstərilməsinin Azərbaycan Hökumətinin əldə etdiyi əhəmiyyətli uğurlardan biri olduğu oxuyucuların diqqətinə çatdırılıb.

Bundan əlavə "ASAN xidmət"in dövlət xidmətlərinin göstərilməsi sahəsində dünyanın ən qabaqcıl layihələrdən biri olduğu vurğulanıb və beynəlxalq sahədə əldə olunan uğurlara xüsusi yer ayrılıb. Məlumatda Dövlət Agentliyinin 2015-ci ildə BMT-nin Dövlət Xidmətləri Mükafatını, 2019-cu ildə isə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatını əldə etməsinə toxunulur.

Həmçinin “ASAN xidmət” təcrübəsinin İndoneziya, Monteneqro, Uqanda, Mərakeş, Özbəkistan kimi ölkələrdə tətbiqinin önəmindən bəhs olunur.

Ukraynada nəşr edilən “AvtoBiznesTur” reklam-informasiya jurnalının 2011-ci ilin dekabr nömrəsində “Azərbaycan güc və uzunömürlülük mənbəyidir” sərlövhəli böyük məqalə dərc edilib. Ölkəmizin Ukraynadakı səfirliyinin informasiya dəstəyi ilə hazırlanmış materialda respublikamız haqqında söhbət açılır, qeyd edilir ki, göy qurşağının zolaqları kimi rəngarəng olan bu şəfalı diyarın hər guşəsində tükənməz qüvvə, enerji, təmiz dağ havası, nadir mineral sular və daha neçə-neçə nemətlər cəmləşib.

Məqalənin cəlbedici yarımsərlövhələri oxuculara çox şeydən xəbər verir: “Naftalanı olan kəsin hər şeyi var”, “Tarixi irs” və s. Zəngin illüstrasiyalı materialda ukraynalı oxuculara Azərbaycanın gözəllikləri, onun səfalı və şəfalı istirahət ocaqları barədə geniş məlumat təqdim edilir.

Məqalədə Naxçıvan diyarına xüsusi yer verilib. Müəllif qeyd edir ki, Naxçıvan Cənubi Qafqazın ən qədim şəhərlərindən biridir. Ordubad rayonu ərazisindəki Gəmiqaya dağındakı abidələr eradan əvvəl IV-I əsrlərə aid edilir. Qazançı, Əlincə qalaları, Əshabi-Kəhf dini abidəsi, Mömünə Xatın, İbn-Küseyr və Qarabağlar türbələri Naxçıvanın qədim tarixə malik olduğunu göstərir.

Yazıda vurğulanır ki, insan orqanizmi üçün faydalı zəngin minerallı Badamlı və Sirab suları şəfaverici qüvvəyə malikdirlər. Culfa rayonu ərazisindəki Darıdağ arsenli su mənbəyi isə bir çox xəstəliklərin müalicəsində istifadə edilir. Müalicə üçün buraya qonşu İran, Türkiyə, Qazaxıstan, Rusiya və başqa yerlərdən gəlirlər.

Müəllif turist səfərinə çıxmaq istəyən ukraynalılara Naxçıvana getməyi məsləhət görür.

Aydınlar.az

Azərbaycan Milli Elmlər Akademiyasının (AMEA) Radiasiya Problemləri İnstitutunun gənc alimi fizika üzrə fəlsəfə doktoru Günel İmanovanın “Radiation-thermocatalytic and thermocatalytic properties of n-ZrO2-n-SiO2 systems in the process of obtaining hydrogen from water at different temperatures” adlı məqaləsi ELSEVIER redaksiyasının çap etdiyi Web of Science; SCOPUS bazalarına, həmçinin, Emerging Sources Citation Index (ESCI) bazasına daxil olan 2.463 impakt faktorlu “Journal of Molecular Structure” Beynəlxalq jurnalında dərc olunub.

Aydınlar.az

Pakistanda urdu, ingilis və ərəb dillində nəşr olunan “Diplomatik Insight” jurnalında Azərbaycan - Pakistan münasibətləri ilə bağlı məqalələr dərc edilib.

Jurnalın üz qabığında Azərbaycan Prezidenti İlham Əliyevin və Pakistan Prezidenti Məmnun Hüseynin birlikdə fotoşəkilləri yer alıb. Məqalələrdə Pakistan Prezidentinin Azərbaycana rəsmi səfəri, keçirilən görüşlər, Azərbaycanın birinci xanımı, Heydər Əliyev Fondunun prezidenti Mehriban Əliyevanın Pakistanın ali “Hilal-e-Pakistan” ordeni ilə təltif olunması və s. məsələlər əksini tapır.

Jurnalda Sülh və Diplomatik Tədqiqatlar İnstitutunun (SDTİ) direktoru, jurnalın baş redaktoru Asif Nurun Azərbaycan-Pakistan münasibətləri haqqında yazdığı ön söz, Koreya Respublikasının Hankuk Universitetinin professoru Rövşən İbrahimovun “Pakistan-Azərbaycan münasibətləri. İqtisadi əlaqələrin inkişafına yeni təkan”, A.Nurun “Pakistan-Azərbaycan əlaqələri. Yeni təkan və yeni bahar” adlı məqalələri yer alıb.

Bundan başqa, Peşəvar Universitetinin siyasi elmlər fakültəsinin professoru Zahid Ənvərin “Azərbaycan-Pakistan münasibətlərinin XXI əsrdə istiqamətləri”, SDTİ-nin əməkdaşı Məhəmməd Bilal Xanın “Azərbaycan-Pakistan münasibətlərinin xülasəsi”, Pakistan Müsəlman Liqası Partiyasının qadınlar birliyinin rəhbəri, tanınmış iş adamı Amna Malikin “Azərbaycanla ticarətin inkişafı”, Bakı Dövlət Universitetinin urdu dili müəllimi Eldost İbrahimovun “Azərbaycan-Pakistan qardaşlıq münasibətlərinin intibahı” adlı məqalələri də jurnalda dərc edilib.

Nəşrdə, həmçinin Azərbaycan səfirliyinin dəstəyi ilə tanınmiş xəttat Azim İqbalın İslamabad şəhərində keçirilmiş “Sülh və harmoniyanın rəngləri” sərgisi, ölkəmizin Pakistandakı səfirliyinin fəaliyyəti haqqında məqalələr də dərc olunub.

Aydınlar.az

Azərbaycan Yazıçılar Birliyinin üzvü, Prezident təqaüdçüsü, şair-publisist Azadə Novruzovanın ərəb dilinə tərcümə edilmiş şeirləri Misirin ən böyük nəşri olan Əl-Əxbar Fondunun “Ədəbiyyat və Tənqid” jurnalının 2023-cü il iyun sayında dərc edilib.

Jurnalda müəllifin müxtəlif şeirləri yer alıb. Şeirləri ərəb dilinə tərcüməçi Fərid Camalov çevirib. Jurnalda yer almış şeirlərin bədii redaktoru filologiya elmləri doktoru, professor Əhməd Sami Elaydidir.

Qeyd edək ki, A. Novruzovanın şeirləri, eyni zamanda, rus, ingilis, ispan, fars, yapon dillərinə də tərcümə olunub.

Aydınlar.az

AMEA-nın Fəlsəfə və Sosiologiya İnstitutunun Siyasətin fəlsəfəsi və sosiologiyası şöbəsinin aparıcı elmi işçisi, siyasi elmlər üzrə fəlsəfə doktoru, dosent Şahin Bağırovun “Siyasi elita və siyasi mədəniyyət: idarəetmə və tabeçilik probleminin siyasi-fəlsəfi təhlili” mövzusunda məqaləsi yüksək impakt faktorlu “Universidad y Sociedad” jurnalında dərc olunub.

Sözügedən jurnal “Web of Science” (A kateqoriyalı) və “Scopus” (Q3) kimi beynəlxalq xülasələndirmə və indeksləşmə bazalarına daxildir.

Aydınlar.az

Elm və Təhsil Nazirliyinin Riyaziyyat və Mexanika İnstitutunun Funksional analiz şöbəsinin aparıcı elmi işçisi, f.-r.ü.f.d. Namiq Quliyevin müəllifi olduğu məqalə Oksford Universiteti tərəfindən dərc olunan “The Quarterly Journal of Mathematics” jurnalında çap olunub.

“Bessel tipli sinqulyarlıqlar və spektral parametrdən asılı olan sərhəd şərtləri bir medalın iki üzüdür” adlı məqalədə göstərilib ki, Bessel tipli sinqulyarlıqlara spektral parametrin “mənfi sayda polyusu olan” rasional Nevanlinna funksiyasından asılı sərhəd şərtləri kimi yanaşmaq olar. Daha dəqiq desək, hər bir uc nöqtəsində ya Bessel tipli sinqulyarlığı, ya da spektral parametrin rasional Nevanlinna funksiyasından asılı olan sərhəd şərti olan birölçülü Şrödinger operatorlarına vahid şəkildə baxılıb və bu cür məsələlər arasında Darbu tipli çevirmələr təyin olunub. Xüsusi halda, bu çevirmələr sərhəd şərtlərində spektral parametr olan məsələlərə aid hər hansı spektral nəticəni Bessel tipli sinqulyarlığı olan məsələlər üçün almağa (və ya əksinə) imkan verir.

Aydınlar.az

AMEA-nın A.A.Bakıxanov adına Tarix İnstitutunun “Azərbaycanın XV-XVIII əsrlər tarixi” şöbəsinin aparıcı elmi işçisi dosent Əhməd Quliyevin “Venesiyaya göndərilmiş Səfəvi diplomatik hədiyyələri” (Giving What They Hold Dear”: Safavid Diplomatic Gifts to Venice) adlı məqaləsi nüfuzlu “Brill” nəşriyyatına məxsus “Diplomatica” jurnalında dərc edilib.

Aydınlar.az bildirir ki, məqalədə Səfəvi-Venesiya diplomatik münasibətlərində hədiyyələr mübadiləsinin rolu və əhəmiyyəti, Səfəvi sarayından Venesiyaya göndərilmiş diplomatik hədiyyələr, onların növləri və rəmzi mənaları tədqiq edilir. Məqalə müəllifin Avropa Komissiyasının “Horizon 2020” Mariya Skladovskaya Küri Fərdi Təqaüd Proqramı çərçivəsində Venesiyanın Ka’ Foskari Universitetində 2019-2021-ci illərdə keçirilmiş layihənin nəticələri əsasında yazılıb.

Qeyd edək ki, sözügedən jurnal “Web of Science” və “Scopus” kimi nüfuzlu beynəlxalq bazalara daxildir.