Dünyada bir ilk: İnsanabənzər robot tərəfindən yaradılmış incəsənət əsəri 1,3 milyon dollara satıldı

Alan Turinqin portreti süni intellekt tərəfindən yaradılıb. Aydınlar.az xarici mətbuata istinadən xəbər verir ki, məşhur britaniyalı riyaziyyatçı Alan Turingin süni intellektlə təchiz olunmuş insanabənzər robot Ai-Da tərəfindən çəkilmiş portreti auksionda 1,3 milyon dollara satılaraq rekord müəyyən edib. Süni intellektin yaratdığı əsərlərin sənət olub-olmaması ilə bağlı mübahisələr davam etdiyi bir vaxtda bu satış sahədə ilk hadisə kimi qeydə alınıb.

İnsanabənzər robotun əsəri alıcı tapdı

Sotheby’s hərrac evində keçirilən auksionda 2,2 metr uzunluğundakı portret “AI God” (“Süni İntellekt Tanrısı”) adı ilə 1,3 milyon dollara satılıb. Hərrac evi bu qiymətin müasir incəsənət tarixində mühüm bir mərhələ olduğunu bildirib. Ai-Da tərəfindən yaradılmış bu əsər, insanabənzər bir robot tərəfindən hazırlanıb və açıq artırmada satılmış ilk sənət əsəri kimi tarixə düşüb.

Süni intellektin incəsənətdə sərhədləri genişlənir

Hərrac təşkilatçıları bildiriblər ki, süni intellekt texnologiyalarının incəsənət sahəsindəki tətbiqi getdikcə daha geniş imkanlar açır və bu satış müasir və çağdaş incəsənətin gələcəyi baxımından əhəmiyyətlidir. Alan Turing çağdaş kompüter elminin atası və süni intellektin nəzəri əsaslarını qoymuş alim kimi tanınır. O, İkinci Dünya Müharibəsi dövründə nasist Almaniyasının şifrələmə cihazı Enigma-nı deşifrə edərək müharibənin gedişatına ciddi təsir göstərmişdir. Həmçinin rəqəmsal kompüterlərin əsasını təşkil edən nəzəri işləri ilə tarixə düşmüşdür.

Ai-Da tərəfindən Turingə ithaf edilən bu portret təkcə vizual sənət nümunəsi deyil, həm də süni intellektin etik və sosial təsirləri üzərində düşünmək üçün bir fürsət yaradır. Danışıq qabiliyyətinə malik süni intellekt dil modelindən istifadə edən Ai-Da robot bu barədə belə deyib: “Əsərimin əsas dəyəri, yeni texnologiyalarla bağlı dialoqa başlama potensialıdır.”

Tarixi bir an: Sənət və texnologiyanın qovuşduğu nöqtə

Ai-Da robotunun yaradıcısı və Ai-Da Robot Studios-un direktoru Aidan Meller bu hərracın vizual incəsənət sahəsində əlamətdar bir an olduğunu vurğulayıb. O bildirib: “Tarixdəki ən böyük sənətkarlar yaşadıqları dövrlə üzləşmiş, cəmiyyətin dəyişikliklərini həm qeyd etmiş, həm də sual altına almışlar.” Mellerə görə, bu satış süni intellekt və incəsənətin gələcəkdə necə birgə inkişaf edə biləcəyinə dair düşünməyə vadar edir.

Xəbər Müəllifi: Vasif Şükür