LIVE
AZ
TR
RU
EN
Bakı Mühəndislik Universitetində (BMU) Koreya Respublikasının İNHA Universitetinin İqlim Böhranına Cavab Layihə Qrupu ilə imzalanmış “Qlobal iqlim böhranına cavab vermək üçün əməkdaşlığın qurulması” sazişi çərçivəsində gerçəkləşən hakatonun iştirakçıları ilə görüş keçirilib.
Aydınlar.az AZƏRTAC-a istinadən xəbər verir ki, bu barədə universitetdən məlumat verilib. Görüşdə bildirilib ki, sazişə uyğun olaraq koreyalı və azərbaycanlı tələbələrdən ibarət 6 komanda formalaşıb, bir neçə ay müddətində hər komanda iqlim dəyişikliyinə dair birgə layihələr hazırlayıblar.
Sonda Bakıda yekun yarışma təşkil olunub və layihələrin birgə təqdimatı keçirilib. İNHA Universiteti və Azərbaycan Dillər Universitetindən olan professor-müəllim heyətinin də təmsil olunduğu münsiflər heyəti tərəfindən ən uğurlu layihə seçilib.
BMU-nun rektoru Yaqub Piriyev adıçəkilən sazişin önəminə toxunub. O bildirib ki, Azərbaycanla yanaşı, 10-a yaxın ölkədə icra olunan saziş çərçivəsində keçirilən yarışmalar, yay təcrübə proqramları qlobal çağırışlara birgə cavab axtarışına töhfə verməklə yanaşı, tələbələrin fərqli ölkə və mədəniyyətlərdən olan həmyaşıdları ilə təcrübə, bilik mübadiləsi aparması üçün nadir imkandır. Beynəlxalq layihələr, həmçinin tələbələrin dünyagörüşünü genişləndirir, onların əməkdaşlıq və liderlik bacarıqlarını inkişaf etdirir.
Bəşəriyyətin qarşısında duran ən ciddi problemlərdən birinin iqlim dəyişikliyi olduğunu vurğulayan Yaqub Piriyev Azərbaycan Prezidenti İlham Əliyevin rəhbərliyi ilə ölkəmizdə iqlim məsələləri ilə mübarizə sahəsində həyata keçirilən mühüm işlər barədə qonaqlara məlumat verib. Ölkəmizin bərpaolunan enerji, tullantıların azaldılması kimi sahələrdə icra etdiyi konkret layihələri diqqətə çatdıran rektor nüfuzlu COP29 beynəlxalq tədbirinin Bakıda yüksək səviyyədə keçirildiyini, dünyanın ekoloji problemlərinə verdiyi mühüm töhfəni qeyd edib. Gənc mütəxəssislərin qlobal ekoloji problemlərlə mübarizədə daha fəal iştirakının vacibliyini vurğulayan rektor bu baxımdan təşkil olunan hakatonun rolunu önə çəkib və BMU olaraq bu cür layihələrin sayının artmasını dəstəklədiklərini deyib. Yaqub Piriyev gələcəkdə bu əməkdaşlığın daha geniş formatlarda inkişafına çalışacaqlarını söyləyib, İNHA Universitetindən gələn nümayəndələrə və layihədə əməyi olan hər kəsə təşəkkürünü bildirib.
Tədbirdə çıxış edən koreyalı müəllimlər BMU-da olmaqdan məmnunluqlarını bildirib, Azərbaycan xalqının qonaqpərvərliyi, Bakı haqqında xoş təəssüratlarını bölüşüblər.
Görüşdə BMU və İNHA arasında icra olunan ikili diplom proqramının əhəmiyyətindən, proqramın icrasının Prezident İlham Əliyevin “Azərbaycan Respublikasında ali təhsil sisteminin beynəlxalq rəqabətliliyinin artırılması ilə bağlı əlavə tədbirlər haqqında” 2025-ci il 22 iyul tarixli Sərəncamına əsasən 2030-cu ilədək uzadılmasından bəhs olunub.
Sonra yarışmanın nəticələri açıqlanıb, qalib komandanın üzvlərinə sertifikatlar təqdim olunub. Layihəyə uyğun olaraq, BMU, Azərbaycan Dillər Universiteti və İNHA Universitetinin tələbələrindən ibarət komanda üzvləri Koreyaya səfər edəcək, orada ekoloji təlimlərə cəlb olunacaqlar.
