LIVE
AZ
TR
RU
EN
Kastamonu Universiteti Beynəlxalq Muzeylər Günü münasibətilə daha bir önəmli konfransa ev sahibliyi edib. Aydınlar.az İXA-ya istinadən xəbər verir ki, Kastamonu İcra Hakimiyyəti Şəhər Mədəniyyət və Turizm Müdirliyi ilə əməkdaşlıq çərçivəsində təşkil olunan konfransda, Türkiyənin aparıcı arxeoloqlarından biri olan Prof. Dr. Fahri Işık, Kastamonu Universiteti Mərkəzi Kitabxanasının Cemil Meriç Salonunda akademik heyət və tələbələrlə bir araya gəlib.
Kastamonu Universitetinin İnsan və Cəmiyyət Elmləri Fakültəsinin Arxeologiya Bölməsi ilə "Mədəni İrs Tələbə Topluluğu" tərəfindən təşkil olunan bu elmi tədbirdə Fakültə dekanı Prof. Dr. M. Serhat Yılmaz, Şəhər Mədəniyyət və Turizm müdiri M. Kerem Seven, Vəqflər Regional Müdiri Halil Alper, müxtəlif dövlət qurum və təşkilatlarının nümayəndələri və çox sayda dəvətli iştirak edib.
Tədbirin fəxri məruzəçisi Prof. Dr. Fahri Işık, Anadolunun eramızdan əvvəl mövcud olmuş xalqlarından olan Luvi mədəniyyəti üzərindən bu coğrafiyanın sivilizasiya tarixindəki əhəmiyyətinə diqqət çəkdi. Müasir sivilizasiyanın mənşəyini anlamağın, insanlıq tarixinin ilk mədəniyyətlərini düzgün oxumaqla mümkün olduğunu ifadə edən Işık, Qərb mərkəzli tarix izahlarının Anadolu mədəniyyətlərini görməzlikdən gəldiyini bildirdi.
O qeyd etdi ki, arxeologiya yalnız keçmişi ortaya çıxarmaqla kifayətlənmir, eyni zamanda gələcəyə kimlik qazandıran bir elm sahəsidir. Mədəni irsin tanınmadan sahiblənilməyəcəyinə diqqət çəkən Işık, gəncləri və cəmiyyəti Anadolunun tarixi irsinə sahib çıxmağa çağırdı.
Çıxışında Qərbin tarixi mənimsəmə yanaşmasını tənqid edən Prof. Dr. Işık, Berqamadan Almaniyaya aparılan Zeus qurbangahı kimi monumental memarlıq nümunələrinin bənzərlərinin Anadoluda daha əvvəl mövcud olduğunu və şəbəkə planlı şəhərsalmanın da bu coğrafiyada başladığını bildirdi.
Akademik heyət, tələbələr və qonaqlar tərəfindən böyük maraqla qarşılanan tədbirin sonunda, dekan Prof. Dr. M. Serhat Yılmaz tərəfindən Prof. Dr. Fahri Işıka plaket təqdim edildi.
